الأخوه اعضاء المنتدى
لكم منى اجمل التحايا والدعوات الصالحات
الجموعى اسم له وقع خاص فى مسامعنا والواحد لما يقول انا جموعى شعرة جلدو بتكلب ... ودى معناها انو بتغير وبتجيهو حالة غيره شديده على الإسم .. الكلام ده انا قاعد المسو فى كل جموعى كبير او صغير مره ولا راجل يعنى اسمنا ده نحن ممكن نموت فيهو ... لكن عندنا عيب ممكن ننشط ونتكاتف ونقيف فى اى موضوع ونحاول بكل ما نملك ان نصل له لحل مثال لينا زمن طويل ونحن نبحث عن مثل هذا المنتدى ونتمنى ان يكون لنا ماعون كرم وسط المواعين المنتشره على الأثير (البطاحين ، الكواهلة ، ناس البطانه ، ناس طابت ، ناس رفاعه ، وامدرمان ومدنى .....الخ ) لكن نحنا نبدأ الحاجه ونجتهد وبعدين ننخ يعنى بالعربى كده ملولين وما بنحب نصاقر الكمبيوتر لفتره طويله ولا الراديو ولا التلفزيون ولا حتى الإجتماعات فى الحى لكن عايزين نتائج ادفعوا كده للتعليم ندفع لكن ما بنحضر اجتماع تطوير التعليم ونشارك بالرأى فى ذلك وبرضو فى كل المحافل ..
مادفعنى للكتابه استقبلنا هذا المنتدى بفرح غامر والكل سارع بالتسجيل لكن سريعا انفضينا وهربنا بعيدا عن المنتدى وبدأت تقل المشاركات شويه شويه وبعدين اصبحت الواحد يسجل ويمر على مواضيع المنتدى وبعدين يرد على موضوع وتانى ما يظهر ..هل هذا هو حالنا نحن الجموعيه دائما ملولين وما عندنا صبر على حاجاتنا عشان نرعاها حتى تصبح مثل باقى المنتديات ام اننا نكتفى بالمعاينه والمتاوقه منبعيد دون المشاركه والتى المفروض يعنى كل زول تخطر على بالو مشاركه ... مساهمه ... مبادره ... اى مشكله حاصله فى الجموعيه لابد من طرحها حتى يكون امرنا شورى بيننا وكمان نحاول نساعد بعض الطالب الما لاقى كتاب .. الذى يبحث عن موضوع فى الفقه ...الذى يريداضافة اى شىء فى مختلف ضروب العلم والمعرف كل هذا وغيره كثير نجده فى المنتديات .. حتى الأفكار المجنونه تجد طريقها للنشر وتجد حيزكبير من النقاش والمجادلات وده يا أخوه الذى يربط الناس ببعض . ارجو ان نرجع الى سابق نشاطنا وتسابقنا ولا نقتل الفرحه الجميله التى عمت ربوع الجموعيه شمال وجنوب فى مهدها ونحكم عليها بالإعدام ونحفر ليها اكبر ود أحد وندفنها ونقعد وايادينا على خدودنا راجين العزاء فى منتدانا الكتلنا برانا ..
اخوتى انا ما متشائم انا متفائل جدا اننا حا نعود اقوى وانشط وتزيد همتنا ونعلى كلمتنا ونبقى شموس تضوى بالمعرفه والجمال والصدق والتسامى حتى نجعل اسم الجموعيه فوق الأسماء ومنتدانا اب لجميع المنتديات ولا يا ربى دى حلمه ما اظن دى حلمه ده واقعنا ودى ظروفنا ومن غير الدخول للمنتدى والتحاور والتلاقى نحصد العكس التباعد والتجاهل والتناسى لبعض ومن تجاهل قضيته الخصم بكسبها ونحنا لدينا خصوم كثر الفقر الجهل التناحر ، الشلليات ، القطيعه ، النميمه ، وكتير الداير كرش بسلك عده عشان نبنى على ساس اكثر بياضا ولمعانا وصدقا ونقاءا ولكم خالص مودتى وتقديرى
