عودة الدراويش شعر الدكتور محمد ود بادي

عـودة الـدروايش

حال هذا البلد بكانى ما سكتني
ريدتاً فيه كيف مالكاني مامسكتني
ناراً فيها كيف ماكلاني كيف لهبتني
إلا تراني فى الآرض الحسيت براني
والناس البتعرض جوة ماسمعتني
إلا تراني أنبح ذي ذي أخواني
والخيل بي عجاجها عمتني
توبي قصير وما غطاني
والزيف أم برد شقاني
قلت أباصر أمرق مرة من أحزاني
وين قبلت سفكت دمي وأتعدتني
ولا زينوبة اخرة يدي فى ا لدنيا أم بناياً هش
من شافتي جقلت مني خنست فى لوايا القش
وهادى سلامى يغسل حزني
إلا سلامه زاد أحزاني زادني عطش
لحقتها فى الفريق أتماشا وانشد من حالها
طلبتها شاي لبست مداسها
قطرت عينى فوق خلخالها
لفحت توبها لحظت ناسا
وقفت عادى عدلت حالها
غزت كوعها هزت راسا
لفتت جيدها قالت لا لا
قالت لى شن معناك وشن كسب الرجاك ور جاك
زمنك كله تاكل بارده ما ضق حر
وزمنك كله نحن نعوم ، وأنت تغني ماسك البر
وزمنك كله فوق الفارقة فوق ريح المدن منجر
الخير إنسرق من دارنا ، لاحسيت لا نحاس القبيلة نقر
ولينا سنين خلانا سموم ، ما شربت حفايره مطر
منيحة الشافع الامهاته راحن فى شموس الحر
صقور الباشا نهشن من ضلوها وفوقنا طارت فر
طلاب الباشا فطرن فيها مالقن البقولها جر
والباشا الغشيم فى ذاته قعقع وفى كبادها فطر
لاولداً بقوله إنتر ولامهيرة تقوله فشر
ويا الباشا الغشيم قول لى جدادك كر
××××
بعد حكت العليها أتوهجت برقن بروق عينيها
كسته خلاصي بين إيديها ما لقيت البلفقو ليها
وقعت دمعة من عينى قلت أخفيها وقعت عينى ذاتها عليها
حست بالمسافة البينا قلت أمشيها
كفتتنى الصقور بى جيها ، والبلد إترمت بى جيها
×××
حكموا اكتافي قطعوا لساني دارو وشيها
غنوا ، إتهنوا ، طربو ، وشربو من بكريها مصرو ثديها
عيني تشوف وسامع صرختها وثكليها
××× ×
هبي يا ريح الصلاح هبي وأمرقي من متاريسك
من طرف البلد شبي ، سوى البرج داك ميسك
بارده علينا تنكبي ودمنا زيت فوانيسك
لا شرق لا غرب بينزف من دراويشك
والليلة يا ريح الصلاح الهابة فيك راحة ووجع
والليلة كل شدراً وحشاه ناقره السوس بيقع
والليلة حق الناس يبين ، والليلة بتشوف البدع
والليلة وين والبرق من تالاك يبين والبرق من تالاك سمين
يقدح كذا سيوف الصحابة الثانين
××××
والعاديات الموريات خرش الزناد فى الصخر جات
جات الخلوق الضايقة لا قوها أجمعين
عرب البوادي الإنشوت ، الأمة دى المصلوبة فوق حبل الصبر ثم إتلوت
والكادحين الصالحين الساجدين العابدين الزاهدين
ونفضنا من سيف الجدود صقر السنين
وسرجنا خيل موروثة من زمن الحسين
وعرضنا زين .... وجمعنا غطى المشرقين والمغربين
وأميرنا صاح الراية وين .... الراية وين
ومشينا بالتاريخ ركبنا على البساط الأحمدي
كايسين محل وقعت سواد الراية وإنقطعت تواريخ النبي
ولقينا باقى الراية فوق قبر الخليفة الراشدي
ملينا دماً كيف ندي
وساريها فوق الفتنة دايخ ومنتكي
وغسلنا بي دمع الندم ، واللوم قميص عثمان من الدم الذكي
وعقدنا حبل الدين على طرف القميص المسلكي
والراية زادت في المدى ، ورفرف قماشها المخملى
وحرسوها ذي سبعين ولي
ما دلها وراث الهنا ، ما دله حراس الأمانة وديدنها
بات من حوار ختم الكتاب ختم السند والعنعنة
بات من ولي ودرويش غرق فى الهمهمات والدندنة
إتحزموا الشيح الطوال ، واللوح درق
أرجونا فوق الجوار مشهادنا تفزع مجدنا
البر فوق لجام الخيل تقل
والتانية فى لجام النفوس المازحة فى درك الزلل
××××
يا امه كسلى ونايمة فى تياب الكسل
وهواها ما شي مع الأضل
الخير مصوبر فى محل والخيل تجقلب فى محل
بعد العدل والريح صلاح والظلم راح وا لصاح قدل
بعد الشروق يا امه وسطها الي إشهد
فى الخلوق بعد ا لشرق نجمك أ فـل
نعشك غشانا على عجل
يا امه وفاها الأجل ، ما تت على سوء الختام
آخر الكلام فى لسانها كان هبل ... هبل .. هبل ... هبل
هبل .. هبل .. هبل .. هبل وسقط هبل

بعد العدل والريح صلاح والظلم راح وا لصاح قدل
بعد الشروق يا امه وسطها اللي إشهد
فى الخلوق بعد ا لشرق نجمك أ فـل
نعشك غشانا على عجل
يا امه وافاها الأجل ، ماتت على سوء الختام
آخر الكلام فى لسانها كان هبل ... هبل .. هبل ... هبل
هبل .. هبل .. هبل .. هبل وسقط هبل


من أجمل ما قرأت للشاعر ود بادي .. نتمنى أن يرد الله غربته , ليواصل هذا الإبداع في الوطن .. من خلال منتديات أدبية .. ليستفيد ويتعلم هذا الجيل من شاعر وقامة كود بادي ..